BO NADAL * FELIZ NAVIDAD 2025

A UNED A Coruña despide o ano agradecendo o compromiso, a participación e a ilusión compartida durante estes primeiros meses do curso académico.

Entre setembro e decembro de 2025, no noso Centro desenvolveuse unha intensa actividade académica, cultural e social que reflicte a nosa vocación de universidade aberta, inclusiva e comprometida coa súa contorna. Este percorrido visual quere ser, ao mesmo tempo, unha felicitación do Nadal e un agradecemento sincero a todas as persoas que o fixeron posible: alumnado, profesores/as, relatores, institucións colaboradoras, asistentes, equipo técnico, administrativo e directivo do Centro.

Graos e Mestrados

A actividade académica de Graos e Mestrados estivo marcada nestes meses por unha aposta decidida pola docencia de calidade e o acompañamento próximo ao estudantado, un dos rasgos distintivos da UNED. A través das titorías semanais presenciais e en liña, o Centro UNED A Coruña deu soporte aos 30 graos e aos distintos mestrados oficiais que oferta a nosa universidade, garantindo un seguimento continuo, personalizado e adaptado ás necesidades do alumnado.

Esta vocación de proximidade reforzouse con iniciativas en colaboración coa Sede Central, como a conferencia/encontro con Nuria del Olmo, catedrática do equipo docente de Psicobiología, que permitiu ao numeroso alumnado asistente establecer un diálogo directo sobre contidos, metodoloxía e experiencia académica na UNED. Así mesmo, o Plan de Acollida 2025 contou cunha gran participación do noso alumnado e profesorado titor, ofrecendo un amplo programa de sesións informativas e de presentación de servizos, espazos e oferta académica e cultural, que se completaron este curso por primeira vez con sesións específicas sobre prácticas externas e curriculares de titulacións como Psicoloxía ou Educación Infantil.

Cursos de Extensión Universitaria: oferta plural e interdisciplinar

A programación de cursos de Extensión ofreceu unha formación diversa e actual, combinando teoría e práctica, presencialidade e modalidade en liña, con propostas variadas en áreas como o Dereito, a Psicoloxía, a Criminología, a Educación, a Arte ou a Historia, que responden os intereses académicos, profesionais e sociais do noso alumnado e da nosa contorna.

A aula como espazo de aprendizaxe activo, o intercambio directo co profesorado e a participación do alumnado foron unha constante nestes meses ao longo dos 22 cursos realizados na nosa Sede da Coruña e os 12 organizados desde a aula UNED Ferrol, todos eles con retransmisión en liña en directo e en diferido.

Entre estes cursos cabe destacar o II Curso de Seguridade e Democracia, que reuniu este novembro no noso Centro a especialistas de primeiro nivel ao redor dun debate rigoroso e actual sobre os retos contemporáneos das nosas sociedades. Un exemplo do compromiso da UNED A Coruña coa análise plural, o pensamento crítico e a formación de cidadanía informada.

UNED Sénior: aprender a calquera idade

O programa UNED Sénior seguiu demostrando que a aprendizaxe non entende de idades. Cunha participación activa e entusiasta, o alumnado sénior asitiu á aulas e actividades, reafirmando o valor social e humano deste programa.

Un espazo de encontro interxeracional onde o coñecemento vívese con curiosidade, proximidade e compromiso.O programa UNED Sénior do Centro Asociado UNED A Coruña caracterízase pola súa firme aposta por levar a universidade ao medio rural, achegando a formación a territorios onde tradicionalmente non chega a universidade presencial.

As actividades desenvólvense en distintas sedes do rural galego, en colaboración con municipios como A Baña, Aranga, Boiro, Brión, Cambre, Guitiriz, Irixoa, Lousame, Monfero, Paderne, Padrón, Porto do Son, Rianxo ou Xermade. Ademais, desde o pasado curso académico, o programa ampliouse coa oferta de materias impartidas tamén no propio Centro UNED A Coruña, reforzando así a proximidade e accesibilidade desta formación para o alumnado sénior da nosa área metropolitana.

Saídas científicas e culturais

As saídas científicas-culturais permitiron trasladar o coñecemento fóra da aula, visitando xacementos, espazos patrimoniais e contornas de gran valor histórico e arqueolóxico, como o Dolmen de Dombate ou o Castro de Elviña.

Estas actividades reforzan unha forma de aprender vinculada ao territorio e á experiencia directa, orientación característica da nosa Extensión Universitaria.

Ciclo de conferencias Martes da UNED: coñocemento compartido

Durante estes meses, o ciclo Martes da UNED volveu a consolidarse como unha das apostas divulgativas máis recoñecibles da nosa programación.

Cada martes pola tarde, da man de profesionais da arqueoloxía, a fotografía, a historia ou a literatura, ofrecemos no noso centro conferencias abertas, rigorosas e divulgativas que achegan a investigación, a historia, a ciencia e o pensamento crítico á cidadanía da nosa contorna e a toda a comunidade UNED a través da emisión en liña. 

Consolidouse así con estas 10 conferencias o noso Centro como un punto de encontro semanal aberto ao diálogo, a reflexión e a aprendizaxe colectiva.  

Xornada Achegando a discapacidade á universidad

Unha das citas máis significativas deste trimestre foi a Xornada Achegando a discapacidade á universidade, organizada en colaboración con Inserta Emprego e Fundación ONCE, que durante unha intensa mañá de decembro permitiunos crear un espazo de sensibilización, formación e reflexión compartida no noso Centro.

A través de talleres, experiencias prácticas e testemuños, como o da adestradora paraolímpica Marta Arce, púxose o acento na accesibilidade, a inclusión e a igualdade de oportunidades no ámbito universitario.

Taller OpenEU: educación, sustentabilidade e transformación dixital

O taller OpenEU – UNED A Coruña situou á educación superior como motor clave para avanzar cara a un futuro sostible e innovador, no marco da iniciativa europea OpenEU e os Obxectivos de Desenvolvemento Sostible.

Este encontro celebrado en novembro no noso centro, permitiu a reflexión e o diálogo entre universidade, administracións, sector privado e sociedade civil, abordando os retos rexionais vinculados á transformación dixital e a sustentabilidade. Unha mostra do compromiso da UNED A Coruña coa Axenda 2030 e co seu papel activo na formación, a investigación e a transferencia de coñecemento desde unha clara vocación territorial.

Novo ciclo Charlas para o teu futuro profesional 

Neste principio de curso académico, demos tamén a benvida a un novo ciclo de conferencias sobre orientación profesional, procura de emprego e emprendemento, organizadas desde o Servizo de Axuda ao Emprego e ao Emprendemento de noso Centro UNED A Coruña.

As Charlas para o teu futuro profesional ofrecen cada mes ferramentas, experiencias e claves para afrontar o futuro laboral desde unha perspectiva realista, crítica e motivadora. Un espazo especialmente valorado por estudantes e persoas en proceso de redefinición profesional.

Feiras de educación e orientación académica

A presenza da UNED A Coruña en citas educativas como a I Feira de Formación e Educación de Ferrol, permitiu presentar e poñer en valor a nosa oferta formativa a futuros estudantes, familias e centros educativos.

A participación nestas actividades reforza o noso papel e compromiso como universidade pública accesible, flexible e comprometida coa orientación académica e profesional.

Desde o Centro UNED A Coruña queremos agradecer profundamente a participación e colaboración de todas as persoas e institucións que fixeron posible este intenso trimestre de actividade.

Desexámosvos unhas Felices Festas e un 2026 cheo de coñecemento, encontros e novos proxectos compartidos.

Seguimos construíndo universidade, xunt@s.